Tað er við gleði, at vit hervið kunngera, at tað longu er liðið eitt heilt ár, síðan vit seinast runnu ørindi á flogvøllin eftir okkara kæru útisetum og ólavsøkugestum. Tað merkir eisini, at tað nú stundar til tað, ið ein verulig ólavsøka við virðing fyri sær sjálvari ikki kann vera fyri uttan, – ja, onkur hevur kanska longu lisið yvirskriftina – Ólavsøkukabarettina!

Tað er nevniliga soleiðis, at aftur í ár fær tann vanligi føroyingurin høvi at vera vitni til hesa fantastisku siðvenju, sum í mong Harrans ár hevur virkað sum ein samfelagskritisk rødd, og onkuntíð enntá eisini hevur fingið summi at flent.

Tað krevur sín mann, og í ár, pílar og skot, eisini sínar kvinnur, at standa fyri einari Ólavsøkukabarett. Tey, sum í ár hava átikið sær stóru uppgávuna, eru vælkendu, vøkru og royndu leikararnir: Búi Rouch, Petur Meinhard Ellebye Andersen, Durita Dahl Andreasen og Mariann Hansen, við hjálp frá Dáva Djurhuus, Aldu Egilstrøð Magnussen og pulvurkaffi. Tað er sostatt talan um ein javnrættindis hóp, ið líkist nógv tí frá sera vælumtóktu kabarettini í fjørð.

Og sum var hetta ikki ivaleyst, so hava vit fingið tónleikararnar í bólkinum Punjab, ið vunnu ársins FMA virðislønir fyri bæði “Ársins Bólk” og “Ársins Nýggja Navn”, at spæla undir og at syrgja fyri, at Ólavsøkukabarettin 2016 verður ársins brak av einari konsert - og uppliving!

Verið øll hjartaliga vælkomin í Sjónleikarhúsið um ólavsøkuleitið at minnast árið, ið fór!

Við kvøðu,
Ólavsøkukabarettin 2016